කොළඹ 13, ප්‍රදේශයේ නිවාස නිරෝධායනයේදී හඳුනා ගත් කොරෝනා ආසාදිතයා රෝහල්ගත කර තිබෙනවා. ඔහුගේ ආශ්‍රිතයන් ලෙස හඳුනා ගත් 161 දෙනෙකු නිරෝධායනයට යොමු කර ඇති බවද සෞඛ්‍ය සේවා අධ්‍යක්ෂ ජනරාල්වරයා පවසා තිබෙනවා. ස්වයං නිරෝධායනයට ලක්වෙමින් සිටිය දී කොළඹ ,ජින්තුපිටිය ප්‍රදේශයේ දී හඳුනා ගත් මෙම පුද්ගලයාගෙන් කොවිඩ් 19 රෝගය සමාජයට ව්‍යාප්ත වීමේ අවධානමක් නොමැති බව සෞඛ්‍ය සේවා අධ්‍යක්ෂ ජනරාල් අනිල් ජාසිංහ මහතා සඳහන් කරනවා.

මියන්මාරයේ ජේඩ් පතලක් නායගොස් සිදු වූ අනතුරින් පුද්ගලයන් 160 දෙනෙක් මියගොස් තිබෙන බවයි විදෙස් මාධ්‍ය වාර්තා කරන්නේ. අනතුරින් තවත් 54 දෙනෙකුට තුවාල සිදුව තිබෙනවා. අධික වර්ෂාවත් සමග මියන්මාරයේ උතුරුදිග ප්‍රදේශයේ පිහිටි ජේඩ් පතලක් නායයෑමෙන් මෙම අනතුර සිදුව තිබෙන අතර තවදුරටත් සෝදිසි මෙහෙයුම් ක්‍රියාත්මකයි. තවත් පතල් සේවකයන් රැසක් මඩවලට යට වී සිටින බවට සැක පලකරන අතර අධික වර්ෂාවෙන් සෝදිසි මෙහෙයුම්වලටත් බලපෑම් එල්ලවී තිබෙන බවද වාර්තා වෙනවා.

නැගෙනහිර ඉන්දියානු බිහාර් ප්‍රාන්තයේ මනාලයෙකු කොරෝනා වෛරසය ආසාදනය වීම නිසා සිය විවාහයෙන් දින දෙකකට පසුව ජීවිතක්ෂයට පත්ව තිබෙනවා. කෙසේ වෙතත් මෙම පුද්ගලයාගේ විවාහයට පෙරත් ඔහු උණ ඇතුළු රෝග ලක්ෂණ පෙන්වා ඇතත් එය සුළු උණ තත්ත්වයක් ලෙස සලකා විවාහ උත්සවය පවත්වා ඇති බවයි විදෙස් මාධ්‍ය වාර්තා කරන්නේ. මෙම විවාහයෙන් පසුව මනාලිය ඇතුළු එහි පැමිණි අමුත්තන් 400ක් පමණ කොරෝනා පරීක්ෂාවට ලක්කළ බව ප්‍රාන්තයේ අගනුවර වන පැට්නා හි ප්‍රධාන වෛද්‍ය නිලධාරි කිෂෝර් චෞද්රි පවසා තිබෙනවා. අමුත්තන් 80 දෙනෙකු පමණ වෛරසයට ධනාත්මක බව පෙන්වා තිබුණත් මනාලියට වෛරසය වැලඳී නොතිබීමද විශේෂත්වයක්.

වියට්නාමයේ රැඳී සිටි ශ්‍රි ලාංකිකයන් 65 දෙනෙක්ද ජපානයේ සිටි ශ්‍රි ලාංකිකයින් 261 දෙනෙක්ද දිවයිනට පැමිණ තිබෙනවා. කටුනායක ගුවන්තොටුපළ වෙත පැමිණ මෙම පිරිසේ සියලු දෙනා පි.සි.ආර් පරික්ෂණ සඳහා යොමුකර ඇති බවයි වාර්තා වන්නේ.

දේශපාලන පක්ෂ සහ අපේක්ෂක ප්‍රවර්ධනය සඳහා මැතිවරණ සලකුණ, අංකය, අපේක්ෂක නම සහිත මුඛ ආවරණ පැළඳ ප්‍රචාරණයේ යෙදීමෙන් වැළකි සිටින ලෙස පොලීසිය මහජනතාවගෙන් ඉල්ලා සිටිනවා. එවැනි ප්‍රචාරණයක් සිදුවේ දැයි පරික්ෂා කරන ලෙස වැඩබලන පොලිස්පතිවරයා විසින් සියලු පොලිස් ස්ථාන වෙත උපදෙස් ලබා දී තිබෙනවා. මැතිවරණ නීති උල්ලංඝනය කිරිම සම්බන්ධයෙන් එකම පක්ෂයේ අපේක්ෂකයින්ගෙන් පැමිණිලි ඉදිරිපත් වන බව මැතිවරණ කොමිසමේ සභාපති මහින්ද දේශප්‍රිය මහතා පවසා තිබෙන අතර ආගමික උත්සවල මැතිවරණ කටයුතු ප්‍රවර්ධනයෙන් වළකින ලෙසද මැතිවරණ කොමිසමේ සභාපති සියලු පාර්ශව වලින් ඉල්ලා තිබෙනවා..