පාසලේ දී හිරිහැරවලට ලක් වීම නිසා දැඩි ලෙස කම්පා වන වයස අවුරුදු නවයක ඕස්ට්‍රේලියානු පිරිමි දරුවෙකුගේ වීඩියෝවක් සීඝ්‍රයෙන් පැතිර යාමත් සමග ඔහු වෙනුවෙන් ලොව පුරා විශාල පිරිසක් පෙළ ගැසී සිටිනවා. කුරු බව හේතුවෙන් පාසලේ දී වෙනස්කම්වලට මුහුණ දුන් සිය පුතු ක්වාඩෙන්ගේ වීඩියෝවක් සමාජ මාධ්‍ය ජාල වෙත මුදා හැරීමට යාරාකා බෙයිල් ක්‍රියා කර තිබෙනවා. "මේ හිරිහැරවලට ලක්වීමේ ප්‍රතිඵලයි," යැයි ඇය එම වීඩියෝවේ පවසන අතර, පුතා තම ජීවිතය අවසන් කර ගැනීමට අවශ්‍ය බව ද පවසයි. මෙම වීඩියෝව මිලියන 19 කට වඩා වැඩි වාර ගණනක් නරඹා ඇති අතර, ලොව නන් දෙසින් සහය ගලා එන්නට සමත් වී තිබෙනවා. එමෙන්ම, #WeStandWithQuaden යන හෑෂ් ටැගය යටතේ විවිධ පණිවිඩ ද පළ වී තිබෙනවා. රංගන ශිල්පී හියු ජැක්මන් සහ පැසිපන්දු ක්‍රීඩක එනෙස් කාන්ටර් ඇතුළු සුප්‍රසිද්ධ පුද්ගලයින් මේ සම්බන්ධයෙන් අදහස් දක්වා ඇති අතර, සමාජ මාධ්‍ය ජාල ඔස්සේ බොහෝ රටවල දෙමාපියන් මෙම වීඩියෝව හුවමාරු කරගෙන තිබෙනවා. "ඔබට තේරෙන තරමට වඩා ඔබ ශක්තිමත්, යහළුවා" යැයි ක්වාඩෙන් හට පැවසූ හියු ජැක්මන් "කරුණාවන්ත වෙන්න" යැයි සියලු දෙනාගෙන් ඉල්ලීමක් කර තිබෙනවා.

කොරියාවේ සේගු ප්‍රදේශයෙන් කිසිදු ශ්‍රී ලාංකිකයෙකුට කොරෝනා ආසාදනය වී නැතැයි කොරියාවේ ශ්‍රී ලංකා තානාපති කාර්යාලය පවසනවා. එහි කම්කරු හා සුබසාදන උපදේශක සෙනරත් යාපා මහතා පැවසුවේ කෙසේ වෙතත් මේ වන විට තානාපති කාර්යාලය ඔවුන් වෙනුවෙන් විශේෂ උපදෙස් මාලාවක් නිකුත් කර ඇති බවයි. කොරෝනා ව්‍යාප්ත වෙමින් පවතින කොරියාවේ සේගු ප්‍රදේශයේ මේ වන විට ශ්‍රී ලාංකිකයින් දහසකට ආසන්න පිරිසක් වෙසෙන බව ඔහු සඳහන් කළා.

හදිසි විදුලි බිඳ වැටීමක් හේතුවෙන් කැළණි ගඟ දකුණ ඉවුර ජල ව්‍යාපෘතිය මගින් ජලය බෙදා හරිනු ලබන ප්‍රදේශ කිහිපයකට ජල සැපයුම අත්හිටුවීමට සිදුවන බව ජාතික ජල සම්පාදන හා ජලාපවාහන මණ්ඩලය පවසනවා. ඒ අනුව, පෑලියගොඩ, වත්තල, ජා-ඇල, කටුනායක - සීදුව, කැළණිය, බියගම, මහර, දොම්පේ මෙන්ම, ගම්පහ ප්‍රදේශ කිහිපයකට මෙලෙස ජල සැපයුම අත්හිටුවනු ඇති.

මහා ශිව රාත්‍රි දිනය අදට යෙදී තිබෙනවා. ශිව දෙවියන් උදෙසා පුද පූජා පවත්වන හින්දු බැතිමතුන්ගේ ධාර්මික මංගල්‍යය මෙයයි. රාත්‍රි නිදි වර්ජිතව උපවාසයේ යෙදී, ශිව දෙවියන්ට පුද පූජා පැවැත්වීමෙන් තමන්ට විමෝක්ෂය ලැබෙන බව හින්දු බැතිමතුන්ගේ විශ්වාසයයි. ලොව පුරා හින්දු බැතිමතුන් උපවාස ශීලය සමාදන් වී මෝහාන්ධකාරය පරදා ප්‍රඥාව ජය ගැනීම සලකුණු කරන, මහා ශිව රාත්‍රි දින උළෙලට පේවී සිටින මෙරට හින්දු භක්තිකයින් සමඟ තමන්ද එක්ව සිටින බවයි ජනාධිපති ගෝඨාභය රාජපක්ෂ ඒ වෙනුවෙන් නිවේදනයක් නිකුත් කරමින් සඳහන් කරනවා. නව ජවයකින් අලූත් හෙටක් පිළිබඳව බලාපොරොත්තු දල්වා සිටින ශ්‍රී ලාංකිකයින් අතරට අපගේ සහෝදර දෙමළ ප්‍රජාවද අයත් බව එහි සඳහන්. අන්තර් ආගමික සහජීවනය අන් කවරදාටත් වඩා බලගන්වමින් රටේ සෑම ජනකොටසක්ම සිය මාතෘ භූමියේ උන්නතිය වෙනුවෙන් කැප වී සිටිනු දැකීමෙන් තමන් සතුටට පත්වන බවයි ජනාධිපතිවරයාගේ නිවේදනයේ වැඩිදුරටත් සඳහන් වන්නේ. අග්‍රාමාත්‍ය මහින්ද රාජපක්ෂද මහා ශිව රාත්‍රි දිනය වෙනුවෙන් නිවේදනයක් නිකුත් කර ඇති අතර, එහි සඳහන් වන්නේ ජාති භේද, ආගම් භේද පසෙකලා සියලූ ශ්‍රී ලාංකිකයින් එකිනෙකා හට අන්‍යෝන්‍ය ගෞරවයෙන් හා විශ්වාසයෙන් යුතුව කටයුතු කළ යුතු බවයි. ගෞරවාන්විත සම්ප්‍රදායකට උරුමකම් කියන හින්දු දර්ශනය හා එහි උත්සවාංග මෙරට සංස්කෘතිය විචිත්‍රවත් කිරීමට සමත් වී ඇති බවද අග්‍රාමාත්‍යවරයා සඳහන් කරනවා.

කටුනායක - කොළඹ අධිවේගී මාර්ගය සම්පූර්ණයෙන්ම වසා දැමේ ගින්නක් හේතුවෙන් මතුවූ දුමාරයත් සමග අධික රථවාහන තදබදයක් ඇතිවීම නිසා කොළඹ - කටුනායක අධිවේගී මාර්ගය මේ වනවිට වසා දමා තිබෙනවා. ඒ හේතුවෙන් කොළඹ - කටුනායක අධිවේගී මාර්ගයේ රථ වාහන ධාවනය නැවත දැනුම් දෙන තුරු තාවකාලිකව වසා දැමීමට තීරණය කළ බව පොලීසිය සඳහන් කළා.